2025 йил 21 ноябр куни Тошкент шаҳрида нодавлат нотижорат ташкилотлари ва фуқаролик жамияти фаоллари учун “Ҳудудий муаммолардан адвокацион ечимларгача” номли икки кунлик ўқув-тренинг ўз ишини бошлади. Тадбир “Марказий Осиё Уюшмаси” жамиятининг Ўзбекистондаги ваколатхонаси ва Буюк Британиянинг Тошкентдаги элчихонаси ҳамкорлигида, лойиҳанинг миллий ҳамкори — Ўзбекистон Республикаси Олий Мажлисининг Инсон ҳуқуқлари бўйича вакили (Омбудсман) институти билан ҳамжиҳатликда ташкил этилмоқда.

Тренингнинг асосий мақсади ҳудудлардаги ижтимоий муаммоларни аниқлаш, таҳлил қилиш ва уларга фуқаролик жамияти воситасида амалий адвокацион ечимлар ишлаб чиқиш салоҳиятини кучайтиришдир. Иштирокчилар инсон ҳуқуқлари, гендер тенглиги, инклюзия, жамоатчилик иштирокини ошириш ва манфаатдор томонлар билан мулоқот қилиш каби йўналишларда замонавий назарий ва амалий билимлар олиш имконига эга бўлмоқдалар.

Тренингнинг очилиш қисмида Инсон ҳуқуқлари бўйича вакил Феруза Эшматова, Буюк Британия Элчихонасининг вакили Хелен Бродрик, “Марказий Осиё Уюшмаси” жамияти раиси Пўлат Аҳунов, ваколатхона директори Гулноз Мамарасулова иштирок этиб, фуқаролик жамияти ривожида очиқ мулоқот, ҳамкорлик ва жамоавий ҳаракатнинг аҳамиятини таъкидлади. Омбудсман институтининг лойиҳада миллий ҳамкор сифатида иштирок этиши инсон ҳуқуқларини ҳимоя қилишда давлат ва фуқаролик жамияти ўртасидаги ўзаро ишонч ва мулоқотни янада мустаҳкамлаши қайд этилди.

Тренинг давомида иштирокчилар инсон ҳуқуқлари асосларидан тортиб адвокация усулларигача бўлган муҳим мавзуларни ўрганмоқда. Ушбу машғулотлар маҳаллий муаммоларнинг илдизларини тушуниш, уларга тизимли ёндашиш ва амалий ечимлар ишлаб чиқиш қобилиятини оширишга хизмат қилади.